சாயி முகுந்தன்

• காரிருள் கலைந்து வெண்மேகம் வெளிப்படும் – உன்
• பேரருள் வியாபமாய் பக்தர்களிதயமதில் நிறைந்திடும்
• கார்மேகம் நகர்ந்து பல்திசைப் பரவும் – உன்
• கருணை மழை நீர் அன்பாயருள் மழை பொழியும்

• நீலமேகம் நித்திலமாய் நிர்மலமாயுன்
• நிதர்சனத்தைக் காட்டும் – அதில்
• நீலவண்ணனுன் வேய்ங்குழல் ஓசை ஒலிக்கும்
• நட்சத்திரக் கூட்டங்கள் நாள்தோறும் சந்திக்கும் – அதில்
• நிலவாயுன்னெழில் வதனம் தெரிந்து அழகூட்டும்

• கோகுலத்தில் கோக் கூட்டம் வரிசையாய் நிற்கும் – அவை
• ஸ்ரீ கிருஷ்ணனுன் நர்த்தனத்தைக் கண்டு ரசிக்கும்
• பர்த்தியினில் பன்னாட்டு பக்தருள்ளம் சங்கமிக்கும்
• அதில் நிச்சயமாயுன் னருட்கருணைக் கதைகளும்
• பரிச்சயமாய் அங்கம் வகிக்கும்

• இயற்கையும் இறையும் நீதானே எதிலுமுனை நினைந்து
• பார்த்தலழகேயதுவும் மெய்யே
• கற்பனைகள் கவி கலைகளிலுமுந்தன்பொற்பாத
• தரிசனம்தான் தர வேண்டும் ஸ்ரீ சாயி முகுந்தா.

– தமிழரசி பாலசுப்பிரமணியம்