பர்த்தீஸ்வரன் பதிகம்

Sairam! This is available only in Tamil*

• வாயிருந்தும் நின்பேரைச் சொல்லவில்லை
• வணங்கவிலை கைகள்நின் வடிவம் தன்னை
• மாயிருளாம் மாயையிலே மூழ்கி நாங்கள்
• மயங்குகிறோம் ஆனாலும் பர்த்தீச் சுரனே
• நோயிதனை நொடியினிலே நீக்கும் உந்தன்
• நூதனமா மருந்ததனை நுகர்ந்தோ மில்லை
• சாயியெனச் சந்ததமும் சொல்லற் கருள்வாய்
• சத்தியனே நித்தியனே சாந்தப் பொருளே! (1)

• இணங்காரை நண்பரென எண்ணிக் கொண்டு
• இல்லாத செல்வத்துக் கேங்கிக் கொண்டு
• நிணந்தன்னை உணவென்று நித்தம் தின்று
• நெறியில்லா நெறிநின்று நெஞ்சில் அதனை
• வணங்காத சுதந்திரமென்(று) இறுமாப் புண்டு
• வாழுகிறோம்! வந்தாய்நீ எம்மைக் காக்க!
• மணம்வீசும் மலர்சூழும் பர்த்தீச் சுரனே
• மலர்ப்பாதம் தரவேணும் மாந்தர்க் கரசே! (2)

• அன்பென்னும் சூரியனே அன்பின் ஊற்றே
• அன்பென்ற மணம்வீசும் தென்றல் காற்றே
• அன்பர்க்கும் அல்லார்க்கும் அன்பே தந்து
• அறவழியில் சேர்க்கின்ற ஐயா! எம்போல்
• வன்பாறை நெஞ்சத்தார் தமையும் அங்கோர்
• வார்த்தையிலே உருக்குகிற வாஞ்சைக் கடலே
• அன்பெந்தன் வடிவென்ற பர்த்தீச் சுரனே
• அருளமுதே ஆரணனே அமுதுக் கமுதே! (3)

• அங்கியினை மேலேற்றி அங்கை கீழாய்
• அழகாகச் சுற்றியபின் அதனில் பாங்காய்ப்
• பொங்கிவரும் பூதியினைத் தருவாய், தந்தே
• போக்கிடுவாய் போகாத நோய்கள் கூட!
• வெங்கதிரின் ஒளியோனே! விரிந்த அண்டம்
• விதமாகச் சமைத்தோனே, வேதப் பொருளே!
• சங்கரனே சக்கரனே படைப்பின் தேவே!
• சாயீசா பர்த்தீசா தருவாய் பாதம்! (4)

• ஆண்கட்குள் ஆணானாய், அரிதாம் பக்தி
• அதுகொண்ட பெண்களிடைப் பெண்மை பூண்டாய்
• தேன்மழலைச் சிறுவரிடைச் சிறுவன் ஆனாய்
• சிவசக்தித் தத்துவமே தெய்வம் ஆனாய்
• வேணுமட்டும் விழிநிறையப் பருகி யுள்ளம்
• விம்மிடவே பேரெழிலோ டெம்முன் வந்தாய்
• பூணுமருள் பொக்கிஷமே பொய்யா மொழியே
• போற்றுகிறோம் பர்த்தீசா பொற்பின் வெற்பே! (5)

• ஆமென்றால் ஆமாமாம் என்றே மும்மை
• ஆமோதித் தருளிடுவேன், இல்லை என்றே
• காமங்கொள் ஆணவத்தால் கருது வோர்க்கே
• அல்லனெனத் தோன்றுவதும் யானே என்பாய்!
• நாமத்தை வாயாலே சொல்லிப் பாடி
• நாள்தோறும் துதிப்போருக்(கு) இங்கும் அங்கும்
• சேமத்தைத் தருவோனே, பர்த்தீச் சுரனே
• சீவனையே சிவனாக்கத் தோன்றிட் டாயே! (6)

• நானீயே நீநானே இப்பே ருண்மை
• நாமறியாக் காரணத்தால் கருணை கொண்டு
• வானேகும் வைகுந்தம் தன்னை நீங்கி
• வந்தாய்நீ மானுடனாய் வேடம் பூண்டு
• தேனான மொழியாலே மீண்டும் மீண்டும்
• தெளிவாய்நீ சொன்னாலும் தெளியோம் நாங்கள்!
• கோனே!நற் கற்பகத்தின் கொம்பே, பர்த்தி
• கொடுஞ்சாபம் தீர்த்தோனே கொள்கைக் குன்றே! (7)

• பேசாரும் பேசிடுவர் நின்கண் நோக்கில்
• பெருநோய்கள் கொண்டாரும் பிணிநீங் கிடுவார்!
• கூசாமல் பழிப்போர்க்கும் கோபம் இன்றிக்
• குறுநகையே விடையாகத் தருவாய் தேவே!
• மாசான ஆணவமாம் மலத்தை நீக்கி
• மாயைதனைக் கர்மத்தை முற்றும் போக்கி
• தேசான ஞானத்தைத் தருவாய் போற்றி!
• தேவர்க்கும் அரிதான சாயி போற்றி! (8)

• கொண்டமரின் வழிவந்தாய் ஈஸ்வ ராம்பா
• கும்பிக்குள் ஒளிப்பந்தாய் குடியே றிட்டாய்!
• அண்டையிலே கர்ணத்தின் இல்லம் போந்தாய்,
• அன்னைபல ராவதெதும் புதுமை யன்றே!
• வண்டமரும் தாமரையாய்ப் பாதம் கண்கள்
• வணங்கியவர் வாழ்வுக்குப் பொறுப்பை ஏற்றுக்
• கொண்டதிருக் கைகளிவை கொண்டோய் வாழி!
• கொடுப்பதுவே கொள்கையெனக் கொண்டாய் சாயீ! (9)

• எம்மையெம் மிடமிருந்தே காப்போன் நீயே!
• எல்லார்க்கும் எல்லாமும் ஆவோன் நீயே!
• இம்மைக்கும் மறுமைக்கும் ஏற்றம் நீயே!
• ஏழிசையில் நாதமென நின்றாய் நீயே!
• செம்மைக்குள் சேர்க்கின்ற செய்யோன் நீயே!
• சிறுமதியைத் தீய்க்கின்ற சீரோன் நீயே!
• அம்மையென அப்பனென ஆனோன் நீயே!
• ஆரறிவார் நின்புகழைச் சாயீ முற்றும்! (10)