நிலா முற்றத்தில்

• செவ்வக வடிவ நீள்முற்றம்
• அண்ணாந்து மேலேபார்க்க முழுநிலவு முற்றும்
• வெண்நிற வெண்ணிலா வெட்டவெளி
• செவ்விளநீரின் குளுமையாய்ப் புன்முறுவலுனதாய்
• ஓ! நம் சுவாமி
• செவ்வங்கிதனில் தங்கம்நிற ‘பங்காரு’ என்றழைத்திடும்
• நம் சுவாமி

• செண்பக மணத்துடன் தென்பொதிகைத் தென்றல் சுகந்தம்
• செந்தாமரைப் பாதம் நினைக்கச் சிந்தூரமாய்ச் சுந்தரப் பாதம்
• பந்தமாய்ப் பார்க்கும் பிரேமைப் பார்வையில்
• பாந்தமாய்த் தெரியும் பாசமான போர்வையில்
• எங்கள் சொந்தம் நீமட்டும் தானென்று
• நினைத்திடும் கோர்வையில்

• பரப்பிரும்மம் உன்னில் தீர்வாய்ச் சேர்கையில்
• அது பிரசாந்தியில் பிரவேசமாகிறது
• கார்முகில்களின் நகரும் மேகக்கூட்டத்தில்
• கண்சிமிட்டும் நட்சத்திரக்கூட்டங்களில்
• நீல வண்ணக் கண்ணனைக் காண எண்ணமெழுகையில்
• நீலமேகச் சியாமளனாய் நித்திலமாய் வேணுகான மிசைத்திட
• வேய்ங்குழலூதி நீ வந்தாயே சத்யசாயி கிருஷ்ணணாய்

• வேல்கொண்ட கையில் மயில் வாகனத்திலேறி மயூரனாய்
• வில்லேந்திய கரத்துடன் சீதா சமேத இலக்குமணனன் சகித
• அனுமனுடனான அழகுக்கோலத்தில் ஸ்ரீ சாயிராமனாய்
• சங்கு சக்ரமேந்தி ஸ்ரீதேவி பூதேவியுடனாய்க்
• கருடவாகனத்தில் மகாவிஷ்ணுவாய்
• சிவசக்தி ஸ்வரூப லிங்கோத்பவனாய்

• கயிலைக்காட்சியில் ஸ்ரீ சைலேஸ்வர பிரம்மராம்பிகை
• ஸ்வரூப ஸ்ரீ சாயீஸ்வரனாய்
• வீணாவாணி கலைவாணியாய், பிரம்மபத்தினியாய்
• வெண்தாமரையில் வீற்றிருப்பவளாய்
• முத்தேவியராய் முத்தமிழாய்க் கல்வி,
• செல்வ, வீர சனாதனியாய்
• தேவி சண்டிகையாய், ஆதிசக்தி, சப்த மாதாக்களாய்ப்
• பஞ்சபூதங்களாய், அகிலமனைத்தும் ஆட்சி செய்விக்கும்

• சாயி அன்னையாய் எப்படி நினைக்கினும் பாபா
• நினைப்பவர்க்கு நினைத்தபோது நினைத்தவாறு
• காட்சிதருவாய் கற்பனையிலும் கனவு நனவிலும்
• காட்சி மீட்சி மாட்சியினில் என்பது சத்தியம்
• சுவாமியுனை முப்போது மெப்போது மிப்போதும்
• நினைத்திட வரமருள்வாய் சரணம் போற்றியே.

– தமிழரசி பாலசுப்பிரமணியம்