எங்குமெதிலும்

• தபோவனத் தலத்தின் விருட்சம் உன்
• தயாநிதித்வத்தைப்போல் தயைசெய்கிறது
• நந்தவனப் பூக்களின் நறுமணம் எங்களின்
• சொந்த மனத்தோட்டத்திலுந்தன் மகிமைகளைச்
• சொல்லியே நறுமணம் வீசுகிறது

• வையகத்தில் எந்த இடம், காடு, மலை, கடல், பன்நாடுகள்
• ஊர், கிராமமாயினும் வீடுகள், போனாலுமங்குன்
• பாந்த, பந்த, பன்மதப் பக்தர்கள்,
• கூட்ட அன்பர்களினருகாமை
• அருமருந்தாய் நட்பாய்க்கிட்டி அன்பைப் பொழிகிறது

• அது உள்ளம் குளிர்ந்து மகிழ்ந்து உன் ஆத்மார்த்த
• அத்தியந்த பக்தி மகத்துவத்தைச்
• சொல்லி ஆனந்திக்கிறது சுவாமி

• எங்கும் நிறையுன்போலுன்னருட் கடாட்ச மிலா
• இடமேதுலகில் சுவாமியுனைப் பார்க்க, பேச,
• நினைக்க, உன் அருளன்பை,
• கருணையை கொடையை, அனுபவித்தும்,
• அனுசரித்தது மானந்தப் பதில்தானே,
• தானாய் ஆனந்த இன்பம் கிட்டுகிறது,
• அப்பக்தி உன்னில் எட்டுகிறது

• ஞாயிறும் ஞாலமும் ஞானமும் திங்களும் பஞ்சபூதங்களும்
• உனையன்றி வேறில்லை சுவாமி
• பஞ்சபூதங்களில் உன் நியதியன்றி யாதுமில்லை
• பஞ்சபுலன்களிலும் உன் அளப்பரிய
• கருணையன்றி ஏதுமில்லை
• பரப்பிரும்மம் ஸ்ரீ சத்ய சாயிநாத தெய்வமே
• உனக்கு ஆத்ம வந்தனம். சரணாகதம்.

– தமிழரசி பாலசுப்பிரமணியம்