Help Desk Number:
பேசாமல் பேசிக்கிடப்பதுவும் எக்காலம்?
- ஐம்புலனை அடக்கி
- ஐங்கரனைத் தெண்டனிட்டு
- ஐம்பொன்னை அடைந்து
- அருள்பெறுவது எக்காலம்?
- ஓயாமல் அழுது
- உள்ளுடைந்து போகாமல்
- மாயன் அருள்பெற்று
- மகிழ்ந்திருப்பது எக்காலம்?
- அவக்கடலில் மூழ்கி
- ஆவிபறி போகாமல்
- சிவசக்தி ரூபனிடம்
- சேர்ந்திருப்ப தெக்காலம்?
- பிரசாந்தி நிலையத்தில்
- பேரின்பத் தேனருந்தி
- பரசாந்தி கொண்டு
- வாழ்ந்திடுதல் எக்காலம்?
- மையல் கொண்டந்த
- மாதவனின் திருவடியில்
- பையப் பரமபதம்
- அடைந்திடுவது எக்காலம்?
- பந்தம் அறுத்தெறிந்து
- பரமன்தனை மட்டும்
- சொந்தங் கொண்டாடும்
- நிலைவருவது எக்காலம்?
- ஆடம்பரமும் பகட்டும்
- அழிகின்ற சுகமும்
- வேடமென்று நீக்கி
- வெளியேறல் எக்காலம்?
- தித்திக்கும் அமுதத்தை
- சிவஞான சத்யத்தை
- முத்திதரும் மூலவனை
- நினைந்திடுவது எக்காலம்?
- சிவானந்தத் தேன்பொழியும்
- பர்த்தீசன் பாதத்தில்
- தவானந்தங் கொண்டு
- தனித்திருப்ப தெக்காலம்?
- ஆசாபாச மெலாம்
- அடங்கி ஈசனிடம்
- பேசாமல் பேசிக்
- கிடப்பதுவும் எக்காலம்?
- இதயத் தாமரையை
- ஈசனுக்குச் சூட்டி
- உதயத்தைக் கண்டு
- ஒடுங்குவதும் எக்காலம்?
- ஆனந்த மூர்த்தியின்
- அவதார மகிமையினை
- ஆனந்தமாய் நுகர்ந்து
- அடங்குவது எக்காலம்?
- தேனுகர்ந்த வண்டாய்
- தியானசிவன் சந்நிதியில்
- நானுகர்ந்து சுற்றி
- நலம்பெறுதல் எக்காலம்?
- பர்த்திபுரி நாதன்
- பார்வையிலே மூழ்கி
- பதமலரில் கிடந்து
- முக்திபெறல் எக்காலம்?
- கல்பதரு வின்கீழ்
- கண்மூடித் தியானித்து
- கஞ்சமலர்ப் பாதத்தை
- யாசித்தல் எக்காலம்?
- அஞ்ஞான மோகத்தை
- அடியோடு விட்டொழித்து
- மெய்ஞ்ஞான சத்தியத்தில்
- மேன்மையுறல் எக்காலம்?
- ஆத்ம யாகத்தை
- அனவரதம் புரிவதற்கு
- தேகம் கருவியென்று
- தெளிந்திடுதல் எக்காலம்?
- ஆத்ம ஞானத்தை
- தேடித் திசையறிந்து
- ஆத்ம ராமனிடம்
- அடங்குவது எக்காலம்?
- முனிவாதி முனிவர்களும்
- தேடிக் களைத்திட்ட
- முழுமுதலை அடிதொழுது
- முக்திபெறல் எக்காலம்?
- ஆரண்யம் தாண்டி
- அகழிபல தாண்டி
- காருண்ய ஞானத்தைக்
- கண்டிடுதல் எக்காலம்?
- பழைய வாசனையை
- அடியோடு விட்டொழித்து
- பர்த்தி வாசனையில்
- தோய்ந்திடுதல் எக்காலம்?
- பர்த்தீசன் கோயிலை
- பன்னாளும் சுற்றிவந்து
- பரமபத வாயிலை
- அடைந்திடுவ தெக்காலம்?
- சங்கல்பம் ஏதுமின்றி
- சங்கரனை தியானித்து
- சத்யஞானம் பெற்று
- ஒடுங்குவது எக்காலம்?
- எண்ணம் அழிந்து
- ஏதுமற்ற கூடாகிக்
- கண்ணன் திருவடியில்
- கலந்திடுதல் எக்காலம்?
- சும்மா இருப்பதே
- சுகமென்று சுந்தரத்து
- எம்மானின் சோதியிலே
- கலந்திடுதல் எக்காலம்?
- மௌனத்தில் தோய்ந்து
- மாதவனின் தீங்குரலை
- மனவெளியில் கேட்டு
- மயங்குவது எக்காலம்?
- உள்ளம் அழிந்து
- உத்தமனின் திருமுகத்தை
- உள்ளிருந்து பார்த்து
- உருகியழல் எக்காலம்?
- சித்தத்தில் ஊறிப்
- பொங்கும் சிவத்தேனில்
- நித்தமும் மூழ்கி
- நினைப்பொழிதல் எக்காலம்?
- எல்லாம் அவனென்று
- பரஞானம் அடைந்து
- எல்லாமாய் ஆனவனில்
- அடங்குவது எக்காலம்?
- சத்வகுண மூர்த்தி
- சந்நிதியில் கிடந்தழுது
- சத்யசிவ சுந்தரத்தில்
- அடங்குவது எக்காலம்?
- (நன்றி: பத்திரகிரியார்-
- சித்தர்பாட்டு வடிவம்)
- -ஶ்ரீ சத்யசாயி கவிதைகள்