Help Desk Number:
ஶ்ரீ சத்யசாயிபாபா பிறந்தநாள் கவிதை
- உலகளந்தாய் தாலேலோ!
- வைகுண்டம் விட்டிறங்கி
- வையகம் காக்கவந்த
- வாசுதேவனே எங்கள்
- சாயிதேவனே தாலேலோ!
- தாரணியைக் காப்பதற்குத்
- தானாய் இறங்கி வந்த
- தாமோதரனே!பர்த்திப்
- பெருமானே தாலேலோ!
- வெங்காவ தூதரின்
- வேண்டுதலுக்கிரங்கி வந்த
- வேங்கட நாதனே!
- ரத்னாகரக் குலவிளக்கே!
- சத்யசாயி தாலேலோ!
- சத்யபாமா வந்துமுன்னாலே
- காத்திருக்க
- சத்ய நாராயண பூஜை முடியக்
- காத்திருக்க
- தாமோதர தீர்த்தம் தாய்பருகிக்
- காத்திருக்க
- தானாய் உதித்து வந்த
- தாமரையே தாலேலோ!
- தேவகியின்
- எட்டாம் கருவுதித்த
- கண்ணனைப் போல்
- ஈசுவரம்மாவின்
- எட்டாம் கருவுதித்த
- சாயிகிருஷ்ணா தாலேலோ!
- அந்த ஆயர்பள்ளிதான் உந்தன்
- கொல்லப்பள்ளியென்று
- குவலயம் வணங்கிடுமே
- கோபாலா தாலேலோ!
- அவதாரமூர்த்தி நீ
- அவதரிக்கும் போதினிலே
- தானாய் இயங்கினவாம்
- தம்புராவும் மத்தளமும்
- ஆனந்தம் பாடினவாம்
- தேவதைகள் ககனமெலாம்!
- மானிடரின் நற்பேறும்
- மாதவரின் வேண்டுதலும்
- ஆதாரமானதய்யா உன்
- அவதார நிகழ்ச்சிக்கு!
- அக்க்ஷய வருஷம் தந்த
- நவமணியே!
- தெய்வப் பொக்கிஷமே!
- எங்கள்
- பொற்பதமே தாலேலோ!
- ஈஸ்வரம்மா பெற்றெடுத்த
- ஈஸ்வரனே தாலேலோ!
- சிவசக்தியாய் வந்த
- சிவபரனே தாலேலோ!
- கார்த்திகைப் பூர்ணிமையாம்
- மூன்றாம் திருநாளாம்
- ஆருத்ரா நட்சத்திரத்தில்
- சோமவாரம் பிறந்த
- சொக்கேசா தாலேலோ!
- சத்யம் பிறந்ததுவும்
- நித்யம் பிறந்ததுவும்
- செகம் காத்து நிற்க
- செகந்நாதன் பிறந்ததுவும்
- நவம்பர் மாதத்து
- இருபத்து மூன்றில்தான்!
- கர்மவினை போக்கவந்த
- கனகேசா தாலேலோ!
- காற்று மணத்து வர
- ஆலய த்வஜஸ்தம்பம்
- வரவேற்புப் பாட்டிசைக்க
- அதிகாலை ஐந்தளவில்
- அவதரித்த ஆண்டவனே
- அற்புதனே தாலேலோ!
- கண்கள் நீலமணி!
- கன்னத்தில் நீலமணி!
- திருமார்பில் பொலியும்
- கௌஸ்துபமாய் நீலமணி!
- ஈஸ்வரம்மாவிற்குள் புகுந்த
- நீலமணிவண்ணா!எங்கள்
- நெடுமாலே தாலேலோ!
- ஈன்று புகழ் கொண்ட
- தேவகியோ ஈஸ்வரம்மா
- தாய்மையிலே மூழ்கடித்த
- யசோதையோ சுப்பம்மா
- சந்தோஷம் தரவந்த
- சாயிகிருஷ்ணா தாலேலோ!
- வண்ணக் குழந்தையாய் நீ
- தொட்டிலில் சிரிக்கையிலே
- வாத்ஸல்யம் பொழிந்திருக்க
- வாரியணைத்திருக்க
- பர்த்தி மாதரெல்லாம்
- படையெடுத்து வந்தனராம்.
- தன் மகவாய் உன்னைத்
- தாலாட்டிப் போயினராம்!
- கொண்டம்ம ராஜுவின்
- குலக்கொடியே தாலேலோ!
- அண்டமெல்லாம் ஆளவந்த
- ஆண்டவனே தாலேலோ!
- பனைஓலைப் படுக்கையிலே
- பாலகன் நீ படுத்திருக்க
- பாம்பணையாய்க் கிடந்து
- உன்னைத்
- தாலாட்டிப் போனதுவாம்!
- பாம்பணைமேல் பள்ளிகொண்ட
- ரங்கனே நீயென்று
- ஆதிசேஷன் வந்து
- அறிவித்துப் போனானோ!
- பாதாதி கேசம் உனைப்
- பாராட்டிப் போனானோ?!
- அழகாய்ப் பிறந்துவந்த
- ஆண்டவனே தாலேலோ!
- மங்கலங்கள் பொலியவந்த
- மாதவனே தாலேலோ!
- தேவதைகள் நடனமிட
- தேவர்வந்து பாட்டிசைக்க
- ககனலோக வாத்தியங்கள்
- களிகொண்டு தாமிசைக்க
- தெய்வம் உனைச்சீராட்ட
- தெய்வங்கள் வந்தனவாம்!
- அத்தனை தேவர்களும்
- அடிவணங்கி நின்றாராம்!
- சப்தரிஷியெல்லாம்
- சுடர்விளக்காய் உனைச்
- சுற்றிவந்து ஜொலித்தாராம்!
- சிவசக்தி உந்தன்
- தேகத்தில் நிறைந்ததுவாம்!
- சங்கு சக்கரங்கள்
- பொன்னடியில்
- பொலிந்தனவாம்!
- எங்கும் நிறைந்திருக்கும்
- இறைவனே தாலேலோ!
- பங்காரு என்றழைக்கும்
- பரந்தாமா தாலேலோ!
- அன்னபூரணி வந்துனக்கு
- அன்பாய்ச் சோறூட்ட
- ஆகாயகங்கை வந்து
- ஆசையாய் நீர்புகட்ட
- அத்தனை சக்திகளும்
- அன்போடு தாலாட்ட
- ஆனந்தம் தரவந்த
- ஆண்டவனே தாலேலோ!
- கோனே எங்கள்
- குலவிளக்கே தாலேலோ!
- நெய்வாசத் தயிரன்னம்
நிதமும் உனக்கூட்ட
தாத்தா ஒருவர் உந்தன்
பசிபோக்க வருவாராம்
- அந்தத் தாத்தாதான்
- யாரோ நீ யாரோ
- இருவரும் வெவ்வேறோ
- ஒன்றேதான் என்றறிந்தோம்
- உத்தமனே தாலேலோ!
- தேடி வரமளிக்கும்
- தேவ நாதன் உனைப்பற்றி
- நாடிகள் பலப்பலவும்
- நல்வாக்கு சொன்னதுவாம்!
- சாசுவததேவன் சத்யசாயி
- ஆரோக்கியம் கல்வி
- ஆன்மீகம் கலைவளர்க்கும்
- ஆனந்த மூர்த்தியிவன்
- முன்னிருப்பு ஷீரடி
- பின்னிருப்பு பர்த்தியென்று
- சுகமாய்ச் சொல்லிடுமாம்
- சுகநாடி இங்கே!
- நித்யானந்த மூர்த்தி
- சத்தியசாயி எனப்
- புத நாடி புகன்றிடுமாம்!
- சங்கல்ப சித்தன்
- கடவுள் அவதாரம்
- சத்யம் தர்மம் சாந்தி பிரேமை
- தரும்
- பிரசாந்திவாசி எனச்
- சுடர்வாக்கு சொன்னதுவாம்
- சுக்கிர நாடி!
- நாராயணன் பேர்கொண்ட
- சிவசக்தி ரூபனுக்கு
- வியாழன் புனித தினம்
- சித்ராவதிதீரன் இவன்
- சமநிலைரூபன் என்று
- பிரம்ம நாடி பேசிடுமாம்!
- ஆந்திரத்தில் கடவுள்
- தானே அவதரித்தான்
- உறங்காத யோகி
- சத்திய நாராயணன் என்று
- பழனி நாடி பகர்ந்திடுமாம்!
- பர்த்தியில் பிறந்த சத்யம்
- ஐந்தடி மூன்றங்குல உயரம்
- சக்தி காந்தமாய்
- ஜெகமெல்லாம் இழுப்பான்
- ஆன்ம விளக்கேற்றும்
- ஆண்டவன்.
- இவன்
- தெய்வ மணிக்குரல்
- திசையெல்லாம் ஒலிக்கும்
- என்று பரவுமாம்
- பராசக்தி பத்மபுராணம்!
- நவம்பர் 23ல்
- நம் இறைவன் ஜனித்தனன்
- என்னுமாம்
- ஜைமினி பாரதம்!
- சத்யம் ரூபம் முகம்
- தீட்சண்யம்
- நிலம் அதிசயம் பற்றி
- நபிமொழியில்
- இருபத்தேழு குறிப்புகளாம்நம்
- இறைவனைப் பற்றி…
- பிரபஞ்ச தீர்க்கதரிசி
- எல்லார்க்கும் இறைவன்
- உலகாளும் சத்யமென்று
- வேதம் விளம்பிடுமாம்!
- தேடி வரமளிக்கும் நம்
- தேவநாதனைப் பற்றி
- நாடிகள் பல இங்கே
- நல்வாக்கு சொன்னதுவாம்!
- அயோத்திக்கு ராமன்
- துவாரகைக்கு கிருஷ்ணன்
- ஷீரடிக்கு ஶ்ரீசாயி
- பர்த்தியில் சத்யசாயி!
- பரந்தாமனாய் வந்த
- பர்த்தீசா தாலேலோ!
- பதினாறுகலை பொலியும்
- அவதாரா தாலேலோ!
- துன்புறுவோர்க் கெல்லாம்
- தூமணி விளக்காவாய்
- அன்புபொழிவார்க்கு
- ஆயிரந்தாயாவாய்
- அருமருந்தே எங்கள்
- அற்புதனே தாலேலோ!
- தர்மம் காத்துநிற்க
- யுகம்யுகமாய் அவதரிக்கும்
- ஜெகந்நாதா தாலேலோ!
- கனகாம்பரதாரி எங்கள்
- கார்வண்ணா தாலேலோ!
- உறங்காத யோகிக்கு
- தாலாட்டு ஏன் என்பாய்
- இது
- தாயன்பால் முளைத்துவந்த
- தங்கமணித் தாலாட்டு!
- நீபிறந்த நாள்போற்றும்
- நித்திலப் பூந்தாலாட்டு!
- பொற்பாத கமலங்கள்
- தொழுகின்ற பேர்க்கெல்லாம்
- பொன்னருளைப் பொழிகின்ற
- பூபாலா தாலேலோ!
- அண்டபேரண்டமெலாம்
- ஆனந்தம் பொங்கிவர
- அன்புருவாய் ஜனித்துவந்த
- ஆண்டவனே தாலேலோ!
- தாரணியைக் காக்கவந்த
- தாசரதீ தாலேலோ!
- உறங்குவோரையெல்லாம்
- எழுப்புதற்குப் பிறந்துவந்த
- உறங்காத கண்மணியே!
- உத்தமனே தாலேலோ!
- உலகளந்தாய் தாலேலோ!
- என்றும் சாயிசேவையில்
- பொன்மணி
- ஜெய் சாயிராம்!