அந்தநாள் மீண்டும் வருமா சாயீ!?
- பாரினைக் காக்கும்
- பர்த்தீஸ் வரனே!
- தாரணி காக்கும்
- தாமோ தரனே!
- பக்தி செய்வோர்க்குப்
- பதமலர் அருளும்
- பகவான் உனக்கிது
- பக்தையின் கடிதம்.
- பண்டும் பண்டும்
- பக்தர் பலரும்
- கண்டும் கேட்டும்
- காலங்காலமாய்ச்
- சொல்லி மகிழும் உன்
- சுந்தர லீலையை
- அல்லும் பகலும்
- அகமே நெகிழ
- நினைந்து நினைந்தென்
- நெஞ்சம் ஏங்கும்.
- அனைத்தும் மீண்டும்
- நடக்கா தாஎன
- ஆதங்கப் புயல்
- அகத்தில் வீங்கும்.
- கஸ்தூரி கையில்
- குடம்பிடித் திருக்க
- ஹஸ்தம் சுழற்றிநீ
- விபூதி பொழிய
- ஷீரடி பாபா
- அபிஷேகத்தை
- நேரடி யாய் நீ
- நிகழ்த்திய காட்சி
- விந்தையில் விந்தை!
- விசித்திர லீலை!
- அந்த நாள் மீண்டும்
- வருமா சாயீ?!
- ஈசுவரன் உன்றன்
- பிறந்த நாளிலே
- ஈசுவரம் மாவந்து
- தைலம் பூசநீ
- குனிந்து கொடுத்துக்
- குறும்புச் சிரிப்பில்
- அமர்ந்து பொலிந்த
- அந்நாள் வருமா?
- பர்த்தியி லிருந்த
- பக்தர் மனைகளில்
- திடும்திடு மென்று நீ
- சென்றதும் நின்றதும்
- வாசலில் உனக்காய்
- தவம் அவர் கிடக்க
- பின்வழி வந்துநீ
- கண்பொத் தியதும்
- கன்னல் பேச்சும்
- கனிமொழிக் குறும்பும்
- இன்னல் தீர்க்கும்
- இன்ப கீதமும்
- பார்த்துக் கிடந்தவர்
- பாக்கியம் செய்தவர்!
- கேட்டுக் கிடந்தவர்
- புண்ணியம் செய்தவர்!
- அனந்தன் உந்தன்
- அன்பை அன்றவர்
- தினம்தினம் நுகர்ந்து
- தித்தித் தனரே
- அடடா அதையெலாம்
- நினைத்தால் ஸ்வாமி
- எதையெலாம் நாங்கள்
- இழந்தோம் என்று
- படபடத் தெங்கள்
- மனந்துடிக் கின்றோம்
- படங்களில் பார்த்தே
- பசியாறு கின்றோம்.
- சித்ரா வதிக்கரை
- தீரத்தி லிருந்து
- சித்ரான்னங்களும்
- திருவிளை யாடலும்
- கண்டு கண்டங்கு
- களித்து வாழ்ந்த
- குமாரம் மாவும்
- குடும்பத் தினரும்
- சொன்னது கேட்டால்
- சுழலும் மனமே
- எழுதியது படித்தால்
- ஏங்கும் உளமே
- வேர்முத லாக
- விழுது வரைக்கும்
- வேர்ப்பலா தானே
- சாயி உன் சரிதம்!
- குதிரைச் சவாரி
- குளுகுளு கண்ணாடி
- அதிரசப் பேச்சில்
- பக்தரை மயக்கி
- சிரித்துச் சிரித்து நீ
- பயணம் செய்த
- சரித்திரம் சம்பவம்
- வருமா மீண்டும்?!
- பனிமலையேற்றம்
- பக்தர் தம்முடன்
- பழங்கோ யில்களின்
- கருவறை புகுந்து
- லிங்கம் வில்வம்
- தும்பை புதுநகை
- தங்கம் படைத்துன்
- விபூதி பொழிந்து
- தெய்விகம் புதுக்கிய
- தேவசம் பவம்
- திரும்பவும் காணும்
- திருநாள் வருமா?
- மக்கள் வெள்ளத்தின்
- இடையிடை யேநீ
- மானாய் மயிலாய்த்
- துள்ளி நடந்து
- கானாம் ருதமே
- கைதட்டிப் பாடி
- தேனார் பேச்சில்
- திசைகளை மயக்கி
- ஆனாத மகிழ்வை
- அளித்ததை யெல்லாம்
- கண்டு களித்தவர்
- கைலாச வாசிகள்!
- வந்து சுவைத்தவர்
- வைகுண்ட வாசிகள்!
- ஒப்பிலாமணி உனை
- பாலபரு வத்தில்
- முப்போதும் வந்து
- பராமரித் திருந்த
- சுப்பம்மா விற்கு
- கங்கைநீர் புகட்டி
- சொர்க்கம் அனுப்பிய
- சத்ய தெய்விகம்
- நினைக்க நினைக்கஎன்
- நெஞ்சம் உருகும்.
- நீதுயில் வதுபோல்
- சயனித் திருக்க
- நீலாம் பரியில்
- எம்.எஸ். இசைக்க
- கேட்கும் போதே
- மனம்இனிக் கிறதே
- பார்க்கும் பாக்கியம்
- வருமா மீண்டும்?!
- காலையும் மாலையும்
- தரிசனம் கிடைக்கலாம்
- லீலைகள் காணும்
- வாய்ப்பும் கிடைக்கலாம்
- உன்னுடன் உன்னுடன்
- வாழ்ந்து களித்த
- அன்னவர் பெற்றது
- யார்க்கினி கிடைக்கும்?
- அந்தநாள் மீண்டும்
- வருமா சாயீ?
- அந்தநாள் அந்தநாள்
- வருமா மீண்டும்?!
- -ஶ்ரீ சத்யசாயி கவிதைகள்
- என்றும் சாயிசேவையில்
- கவிஞர். பொன்மணி